ပန်းတိုင်မဲ့ခရိတ်သည်

တောင်ခိုးကိုနှိက်သက်ရေ သူငယ်ချင်းတစ်ယောက်နန့်အကျွန်ရေ ဘူးတစ်လုံးစီယူ၊ ဘုန်းကြီးသင်တိုင်းရှည်ကြီးတိဝတ် တစ်ယောက်ကိုဖေသျှာ တစ်ရာစီယူပြီး ကေခရိတ်ထွက်ကတ်ပါရေ။ဒေထက်ဖေသျှာအပိုမလိုပါ။ ဖေသျှာတစ်ရာယင် အရေးပေါ်အတွက်သာ။ မြို့တိ မှာတောင်း၊ ရွာသျှေဇနပုဒ်တိမှာတောင်း၊ တံခါးဝတိ၊ အိမ်ဖြူကကြီး၊ တာအိုဘုရားကျောင်း၊ ဘုန်းကြီးသင်္ခမ်း၊ တောင်းရမ်းခကတ်တေ။ ပဇာကိုပင်တောင်းရဖို့ဆိုစွာကိုလည်း သတိပြုခကတ်ပါရေ။ ထမင်းကိုရာတောင်းပါရေ။ အရက်ကိုမတောင်းပါ။ ဟင်းရွက်ကန်စွန်းကိုရာတောင်းပါရေ။ သားငါးကို မတောင်းပါ။ တောင်းရေအသံယင်နနှိမ့်ချချပါ။ ကကြွီကကွဲမဟုတ်ပါ။ ပီးရေအခါ အကျွန်ရေ သူရို့အနားကထွက် လားပါရေ။ မပီးရေအခါမှာလည်းသူအရို့အနားက ခွာလားပါရေ။ အဓိက ရည်ရွယ်ချက်က အစာမငတ်ဖို့ပါ။ တချို့လူတိက ရိုင်းပျပါရေ။ ဦးညွှတ်ပြီး ရိုင်းပျမှုကို ခံယူလိုက်ပါရေ။ တောင်းစရာနေရာမဟိကေယင် တောင်းလို့မဖြစ်ပါ။ အကျွန်ရို့ယူခရေဖေသျှာထဲက တစ်ကျပ်တစ်ပြား သုံးရပါရေ။ မသုံးမဖြစ်မှသုံးစွာပါရာ။ခရိတ်ပန်းတိုင်မဟိပဲ ခရိတ်လားစွာပါ။ ကိုယ့်ကိုယ်ကိုတွိရေနိရာမှာ တချက်သျှေရပ်ပါရေ။ အသာအသာရာလားပါရေ။ တနိ့မှာမှ လီပေါင်း တစ်ဆယ်၊ နှစ်ဆယ်၊ သုံးဆယ်၊ လေးဆယ်၊ ငါးဆယ်။ ဂဂေါင်းကြိုးစားပန်းစားမလုပ်ပါ။ ညောင်းအောင်ထိတော့လားပါရေ။ တောင်တန်းနန့် စမ်းရီကိုတွိကေယင်၊ စမ်းနန့်ကျောက်တုံးဖဖြူ၊ ရီကြက်နန့် ငှက်သာရကာက ဖမ်းစားရေအခါ၊ ရီထဲက ကျွန်းအငယ့်သျှေ တနိရာကိုရွီးပြီးကေ ကျောက်တုံးတစ်ခုထက်မှာထိုင်ပါရေ။ အဝီးကိုငေးပါရေ။ သစ်ခွတ်သမားတိ၊ တံငါတိ၊ ကျွှန်းသားတိ၊ ဇရာဒုဗ္ဗလ သက်ကြီးရွယ်အိုတိကိုတွိ့ရေခါ ဇာသူဇာဝါပါလို့ နှုတ်ဆက်မနိခပါ။ တောတောင် ရာသီသာယာလှပစွာကိုရာ ပြောပါရေ။ တချက်တပြနန့် ဝမ်းပန်းမနည်း ခွဲခပါရေ။
ဥတုဆိုးကေ ခိုစရာယှာပါရေ။ ကုန်းကြောင်းလားရေခါ ဘေးကိုရပ်ပြီး တခြားလူတိကို ဖယ်ပီးပါရေ။ လှီစီးရေခါ တခြားလူတိကို ကိုယ့်အရင် လှီထက်တက်စီပါရေ။ မိုးသက်မုန်တိုင်းလာရေခါချောင်းမြောင်းကိုဖြတ်ဖို့မကြိုးစားပါ။ ချောင်းမြောင်းဖြတ်ရေခါ မိုးသက်မုန်တိုင်းကျရေခါမှာယင် စိတ်နှလုံးကိုငြိ်မ်အောင်ထားပါရေ။ ဘဝကို နားလည်မှုဟိစွာ ကံကြမ္မာကို အပ်လိုက်ပါရေ။ အကျွန်ကို အကျွန်ရို့ပြောကတ်ပါရေ။ မြစ်ကိုကူးယင်းရီနစ်စွာလေ့ကံကြမ္မာအလိုပါရာ။ စိုးနှောင့်ဗျာပါပွေကေယင် လွတ်ဖို့လို့လား။ ငရို့မလွတ်ကေ ယင်းရေငရို့ခရိတ်အဆုံးပါ။ ကံကောင်းထောက်မ လွတ်ရေအခါ အယင်ပိုင် ခရိတ်ဆက်ရုံပါ။ ရိုင်းစိုင်းရေ့ လူငယ်တစ်ယောက်နန့် မတော်တဆ တိုက်မိရေအခါ ထိုသူငယ်ကရိုင်းစိုင်းကေလေ့ သူ့ကိုယယိုင်ကကျေးတောင်းပန်လိုက်ပါရေ။ တောင်းပန်ကေလေ့မရ၊ တိုက်ကြခိုက်ကြရဖို့ဆိုကေတော့ယင်းရေ ငရို့ခရိတ်အဆုံးပါ။ မတိုက်ရပဲလွတ်လာကေတော့ခရိတ်ဆက်ရုံပါရာ။ တစ်ယောက်ယောက် နာမကျန်းဖြစ်ရေအခါ မကျန်းမာသူကိုပြုစုဖို့ နားရပါရေ။ ဆီးသျှေဝါးသျှေ တောင်းရပါရေ။ နာဖျားသူကယင် တတည်ငငြိမ်ခံယူပါရေ။ သူကယင်သူ့ အတွင်းကို ပြန်ကြည့်ပြီး သီခြင်းကို မကြောက်ပါ။ ယျေဇုနန့် ကြီးကျယ်ရေ ဖျားနာခြင်းလေ့ အငယ့်သျှေဖြစ်လခပြီးကေ အာဂန္တု အဖျားဆိုကေယင် ပျောက်လခပါရေ။ သီနိစိဗျာလ်ဆိုကေယင် ဒေယျေ ငရို့ခရိတ်အဆုံးပါ။